ఇంటి ముందు లాన్ లో కూచుని ,తలెత్తి బంగ్లా వేపు చూసింది ,ఇంత సాధించిన ప్రతి వాళ్ళ లాగ '' ఆమె ''
పెదవులు చిరునవ్వు తో విచ్చుకోలేదు ,కళ్ళు గర్వం గా ఆనందం తో మెరవలేదు . నిర్లిప్తం గా ఒక నిట్టూర్పు
విడిచింది . కారణం ఆమె , ఏమిసాధించిందో ,ఏమి పోగొట్టుకుందో ఆమెకు తెలుసు . అదేమిటతెలుసుకునే
తీరికా , ఆలోచనా లేనివాళ్ళు అదృష్ట వంతులు . అమాయకంగా రోజులు వెళ్ళిపోతాయి .
ఆమె యవ్వనపు తొలినాళ్ళలో , '' ఆది'' ని ప్రేమించింది . ఆషా మాషీ ప్రేమలు అప్పట్లో లేవు , చూసిన వెంటనే
'ప్రేమ ' సాయంత్రం సెల్లో మెసేజ్ ,మరుసటి రోజు బండి మీద షికార్ ,మరుసటి రోజు మూవీ ,తర్వాతి రోజు తగువు
విడిపోవడం ,ఇంతచక్కని అవకాశాలు లేని రోజులవి ,కాలేజ్ లో ,'కొన్ని ' ప్రేమ జంటలువున్నా వీరిద్దరే పెళ్లి
చేసుకుంటారు అనుకునేవాళ్లు ,అందరూ ,అంత చక్కగా వుండేవాళ్ళు . మూడేళ్ళు ఇట్టే గడిచాయి ,ఉద్యోగాల పై
నిషేధమున్న రోజులవి . అలంటి సమయం లో అతనికి వుద్యోగం వచ్చింది . 'ఆమె 'ఆనందానికి అవధులు లేవు .
''కాని ''ఆ ఆనందం ఆవిరవ్వడానికి ఎంతోసేపు పట్టలేదు . వుద్యోగం వేయించింది మేనమామ కనుక అతని
కూతురినే పెళ్లి చేసుకోవలన్నదే షరతని చెప్పాడు . కనుక నిన్ను పెళ్లి చేసుకోలేనన్నాడు . నయం తనతో
ఉండమన్నాడు కాదు ,అంత గౌరవంగా చెప్పాక ఇంకేంటి ?.. ఆ బంధమెంతగా భాదించిందంటే ,అలా కొన్ని
నెలలు అయోమయం లో వుండి పోయింది . మొదటిసారిగా మనుష్యుల మీద ,మమకారాల మీద అసహ్యం
వేసింది . వాళ్ళ వ్యాపార లక్షణం తనని కుంగదీసింది . కొన్ని నెలల లోనే తండ్రి తనకీ చిరుద్యోగినితెచ్చాడు
వరుడిగా ... ! సమయం కావాలంది ,చెల్లెలు పెళ్లి చెయ్యాలి కాబట్టి తప్పదన్నాడు ,త్వరపడాలన్నాడు .
ఆయన్ని గౌరవించి పెళ్లి చేసు కుంది . పెద్ద గొప్పగా జీవితమేమి మారలేదు కాని ఇద్దరు మగపిల్లలు .
పిల్లలిని పెంచే క్రమం లో తానూ ,ఆస్తులు పెంచే క్రమం లో అతనూ ,డిపార్ట్ మెంట్ పరిక్షలంటూ ,కెరియర్
అంటూ క్షణం తీరిక లేకుండ పరుగుల్లో అతనూ బిజీ ...
చెల్లెలు ప్రేమించి పెళ్లి చేసుకుంది . ఎంతో పోరాడి తల్లి తండ్రులని ఒప్పించి మరీ పెళ్లి చేసుకుంది . చెల్లెలంటే
వాళ్ళ అత్తగారికి ప్రాణం . చాల బాగా చూసుకుంటుంది . తనకు మాత్రం తన అత్తగారు ఏరి కోరి చేసుకున్న
కోడలైనా ,ఏదో ఒక పుల్ల విరుపు మాటలంటుంది . చెల్లెలు పెళ్ళైన నాలుగేళ్ళకే అమెరికా వెళ్ళిపోయింది .
భర్తకి అక్కడ వుద్యోగం . తనకీ ఇద్దరు పిల్లలు అత్తగారు వెళ్తూ వస్తూ వుంటుంది . ఎప్పుడన్నా తను
వచ్చినా మాట్లాడు కోలేనంత బిజీ ..
పిల్లలిద్దరూ బాగా చదువుకున్నారు , జీవితమంతా ఏ సంపాదన కోసం పరుగులేట్టాడో భర్త , ఆ సంపాదన
వాళ్ళను విదేశాలు పంపడానికి ఉపయోగ పడింది . వాళ్ళు వెళ్ళిపోయారు ,ఒకరి తర్వాత ఒకరు . మళ్లీ
ఇద్దరే మిగిలారు . భర్త చెడ్డవాడు కాదు ,అలా అని మంచివాడు కాదు . కష్ట పడటం తెల్సు ,సంపాదించడం
తెల్సు ,కాని ప్రేమించడం తెలీదు ,ఆప్రేమని ప్రదర్శించడం రాదు . ఆసరాగా వుండడం రాదు ,అవసరాలు
కనిపెట్టడం ,అవతలివారిని పట్టించుకోవడం తెలీదు . ఎందుకో మనసంతా ఖాళీగా వుంది . తరచి చుస్తే
చిన్నతనం లో తండ్రిఅంటే ప్రాణం ,తర్వాత ఎవరినో ఇష్టపడి దగా పడ్డది . ఆనిముషమే తనలో ప్రేమించే
గుణం అంతరించి పోయి వుంటుంది . భర్తకు కూడా దగ్గర కాలేక పోయింది . అతనుకూడా యంత్రం లా
సంపాదన అనే ఎండా మావుల వెంట పరుగు తీసాడు . మొక్కుబడి గా జీవితం గడిపారు తామిద్దరూ !
ఇప్పుడు ఈ యాభై ఏళ్ళ వయసులో కూర్చుని ఆలోచిస్తుంటే ,తను పొందినది ఏమి లేదని తెలుస్తోంది .
ఆడవాళ్లంటే లత లాంటి వారంటారు , బలమైన పందిరి ఆసరా దొరికితే జీవితం ఒకలా ,నేలని ఒదిలేస్తే
మరొకలా ,వుంటుంది . ప్రేమ కోసం ఆరాట పడటం ,ఆలంబన కోసం ఆరాట పడటం స్త్రీల బలహీనత
అదే భగవంతుడి రాత కూడా ,ఇలాంటి సంఘర్షణలో గాడి తప్పి పోయిన జీవితాలెన్నో .. భర్తలో ఆ
ప్రేమకోసం వెదుక్కుంటుంది . కుటుంబానికి ,ఉద్యోగానికి రెంటికి సమయాన్ని కేటాయించలేక ,
సమన్వయం లేక ,ఉరుకుల పరుగుల జీవితం లో ఎవరికోసం సంపాదిస్తున్నారో వాళ్ళనే నిర్లక్ష్యం
చేస్తూ ,ఎవరికైతే అండగా ఉండాలో వాళ్ళకే లేనివాడయ్యాడు . జీవితం అంటే ఒక్కరిది కాదు ,
భార్య భర్తలిద్దరిదీ .. అతని అండే లేనప్పుడు ఈసౌకర్యాలు వుంటే ఎంత ,ఊడితే ఎంత ?........
దాదాపు అందరి కతలు [వెతలు ] ఇలాగనే వుంటాయి ,కాస్త అటూ ఇటూ గా , అన్నట్లు
''ఆమె '' పేరు చెప్పలేదు కదూ ! పేరెందుకు ..? ప్రతి ఇంట్లోనూ వుండే వుంటుంది
,అమ్మ గానో అక్కగానో , చెల్లి గానో , భార్యగానో మనం గుర్తించమంతే .................
******************************
No comments:
Post a Comment