నదులు .

*************************************************************************

దసరా శుభాకాంక్షలు .

దసరా శుభాకాంక్షలు . 

దసరాలో  నవరాత్రి తొమ్మిది  రోజులు  నవరాత్రులు సందడి ,దేవాలయాల సందర్శనం ,

అమ్మవారి అవతారాల పావనం ,ముఖ్యం గా  ఈరోజు  రావణ దహనం ,పాలపిట్ట ,జమ్మి 

చెట్టు దర్శనం  ఇవన్నీ  ఇక్కడి ఆచారాలు .  అంతే కాదు  దసరా రోజు  స్నేహితులు 

బంధువులు  ఇంటికి వచ్చి ''  బంగారం '' పేరుతొ అట్టా   ఆకులు ఇచ్చి ఆత్మీయ 

కౌగిలి ఇచ్చి వెళ్తారు  ఎంత మంచి  ఆచారమో  కదా !

ఈ అలంకారాలు అన్నీ  మా ఇంట్లో  దసరా కోసం  చేసినవి , నా ఆనందం కోసం 

చేసుకున్నవి  మీరు చూసి ముచ్చట పడతారని  ఒక ఆశ . 

**************************************************************************

దేవి నవరాత్రులు

*************************************************************************

సాంప్రదాయం

నాకెప్పుడూ అన్పిస్తూ  ఉంటుంది ,మన సాంప్రదాయం ఎంత గొప్పదో కదా  అని . ఈమధ్య
వచ్చిన ఒక సినిమాలో ''ఒక టీ తాగినంత సేపట్లో వరుడ్ని నిర్ణయించుకోవాలా '' అంటుంది .
జీవితాంతం కలిసి ఉండాల్సిన వాడిని  టీ తగినంత సేపట్లో అంటే...  కష్టమే మరి . కానీ
ఒక విషయం మాత్రం భేషరతు గా  ఒప్పుకోవాలి , పెద్దవాళ్లన్నా ,సాంప్రదాయాలన్నా ఎంత
గౌరవం లేక పోతే ఇంత  మంది కట్టుబడి వుంటారు ? పెళ్లి చీరలకోసం రోజంతా సరిపోదు
ఎంపిక చెయ్యడానికి ,ఏ ఫంక్షన్ హాల్ ,ఎలాంటి భోజనం ,ఎన్ని ఐటమ్స్ ,ఎంత ఖర్చు అంటూ
గంటలతరబడి  చర్చించే  పెద్దవాళ్ళు కూడా  అబ్బాయి గురించి  నిముషం లో నిర్ణయం
తీసేసు కుంటారు ,ఆశ్చర్యం కదా (కాదు  నమ్మకం ) కాబట్టే ఇన్ని కుటుంబాలు ఇంత
సర్దుకు పోతు సంతోషం గా ఉంటున్నాయి . అంతే  కదా మరి  ఒకే ఇంట్లో ఉంటే తల్లీ ,
కూతురూ  కూడా ఎదో ఒక సందర్భం లో అరుచు కోకుండా వుండరు . అలాంటిది ముక్కూ
మొఖము తెలీనియని వ్యక్తి తో  జీవితాంతం .... . అన్ని బావుండి సంసారం సక్రమంగా
సాగి పోతే ఒకే ,లేకపోతే...   అయినా కూడా మనసులో లోటు మొహం లో కనబడ కుండా
బండి లాగించేస్తూ  వుంటారు . ఈడూ జోడూ  కూడా లేని జంటలుంటారు ,లావుగా వున్న
అమ్మాయికి సన్నగా పొడుగ్గా వుండే  భర్త ,పొడవాటి అమ్మాయికి పొట్టి గ వున్న భర్త , అసలు
ఆవిషయమే  పట్టించుకోకుండా  హాయి గా  చేతులో చెయ్యేసుకుని కబుర్లు చెప్పుకుంటూ
వెళ్లిపోతుంటారు ,అది మనసులు కలవడం వాల్ల కావచ్చు . అన్ని చక్కగా వున్న వాళ్ళు
అరుచుకుంటూ పోట్లాడుకుంటూ  ఇరుగు పొరుగు ను కూడా మనశ్శాన్తి గా బ్రతకనివ్వరు .
మా నాన్న  ఒక ఇంగ్లిష్  సామెత చెబుతుంటారు ,హ్యాపీ గా వున్న కుటుంబాలన్నీ ఒకే రకంగా
ఉంటాయట , బాధలో  వున్న కుటుంబాలు మాత్రం రక రకాలుగా ఉంటాయట .


ఒక సామెత కూడా వుంది ,''ఈడూ  జోడూ చూసి ఏట్లో తొయ్యమని '' కానీ ఇప్పుడు మాత్రం
చక్కగా అటు  ఇటూ పెద్దలు పిల్లల్ని మాట్లాడుకుని అభిప్రాయాలు కలిస్తేనే  సరే అని
చెప్పమంటున్నారు ఇది బావుంది . వాళ్ళు మాట్లాడుకొనిసరే అంటే ముందుకు వెళ్తున్నారు
ఇలాంటి వన్నీ  పెద్దవాళ్ళు చూసే టప్పుడే  మళ్ళి  వాళ్ళు ప్రేమించినపెళ్ళైతే రూపు రేఖలు
ఎలావున్నా పట్టించుకోరు ,నాకు ఇది చాలా ఆశ్చర్యం గా ఉంటుంది . ప్రేమ గుడ్డిదట కదా ,
నాకు  అలాంటి  ప్రేమ తో పెద్దగా పరిచయం లేదు లెండి . నాకు  జీవితంలో చాలా
క్లారిటీ  కావలి , ఎలాంటి వారు , నాతో  ఎలావుంటున్నారు ,ఎంతవరకు  నమ్మచ్చు
దాంతో  క్వాలిటీ  పీపుల్  మిగులుతారు .

పెళ్లి కాంగానే  ముక్కూ మొహం తెలీని వాడి చెయ్యి పట్టుకుని  జీవితాంతపు జైలుకు
తరలి వెళ్లిపోవడం (సాంప్రదాయమే  కదా మరి ) నా అన్న వాళ్ళకి దూరమై పోవడం
''ఆడపిల్ల ''అన్నారుగా  ఆడనే ఉండనియ్యమని  పుట్టింటి వాళ్ళు తలచక పోవడం ,
కాళ్ళు కడిగిన నాడే  చేతులు కడిగేసుకునే వాళ్ళను  బొచ్చెడు మందిని చూసేను .
పసుపు కుంకుమలు పెట్టాల్సిన అన్నదమ్ములే  ఎందుకులే చీర ఖర్చు అనుకునే
రోజులు వచ్చాయి . లాటరీ లాంటి పెళ్లి లో లాటరీ తగిలితే  ఒక ఎత్తు లేకుంటే మరో
ఎత్తు . వెళ్లిన చోట భర్తే ప్రియుడై ,స్నేహితుడై  అండగా ,జీవితాంతం తోడుగా ఉంటే
ఆ అదృష్టమే వేరు . కానీ ఎవరి చెయ్యి పట్టుకుంటే  ధైర్యంగా వుంది, ఇతను జీవితం
అంతా పక్కనుంటే చాలు అనుకుంటుందో ,అతనే పిరికి వాడని  ప్రతి నిముషం
ఆమె ఆసరాకు చూసుకుంటాడని తెలిస్తే ,మొదలు నరికిన చెట్టులా కూలడం ఖాయం .
కానీ దైవికంగా  కాలం గడిచే కొద్దీ .. కొద్దీ కొద్దిగా అర్ధమౌతూ పొతూ ఉంటే మనసు ఒప్పుకోని
నిజం చేదు మందులా ,మందులేని వ్యాధిలా  శరీరము  మనసూ  వ్యాపిస్తే అందమైన
జీవితం  బొట్టు లేని సుమంగళి లా మిగిలి పోతే .. దాంపత్య మంటే ఆవేశమో ,అవసరమో
కాదు ,ఒక చల్లని స్నేహం. ఆడవాళ్ళకైనా ,మగవాళ్ళకైనా  తోడుఅవసరం ,పీడకాదు .


అతి మధురం గా  పాట పాడే అమ్మాయికి  చెవిటి వాడు భర్తయితే ,ఆ గానం ఎప్పటికి
చేరుతుంది  అతనికి ,అద్భుత మైన  కధలు  కవితలు రాసే వ్యక్తికి ,చదువు రానిది
భార్యైతే ,చదివి విని పించేలోగా  వడియాలు తియ్యాలని భార్య మణి సెలవిస్తే ...
పేద్ద పోలీసాఫీసరు ,నిజాయితీ పరుడు మంచి పేరు వున్న వ్యక్తికి ఇంటికొచ్చేసరికి
''పోలీసుద్యోగం నాకు భయం మానెయ్యకూడదూ అనే  భార్యదొరికితే , పూజలు వ్రతాలూ
చేసే  భార్యకి ''చాదస్తం '' అనే భర్త దొరికితే ,అద్భుతంగా నాట్యం చేసే నాట్య మయూరికి
అంధుడు భర్తైతే ... అందమైన భార్య వుండి  కూడా  మొహం 'మాత్రం' చుడనివాడైతే ..
చక్కగా వండి వారిస్తే , తిని త్రేన్చే వాడే కానీ మెచ్చుకునే  అలవాటే లేకుంటే ఆ
నరకం  ఎలా ఉంటుందీ .. పగ వాడికి కూడా వద్దని పిస్తుంది కదా !అలాంటి వారూ
లేక పోలేదు . ఒకరికి ఒకరుగా వుండే వాళ్ళు పది శాతం  ఉంటే ,ఇలాంటి వాళ్ళు
తొంభై శాతం వున్నారు . వారి ఓపికను ఏ విధం గా మెచ్చుకోవాలి ,సాంప్రదాయాన్నీ
పెద్దవాళ్ళని గౌరవిస్తూ ,అందని ద్రాక్ష పుల్లన ,అందిన దాంతో సర్దుకు పోవాలీ...
 అనుకుంటూ జీవించేస్తున్నవాళ్ళు మన మధ్య ఎంతమంది లేరు ? వాళ్ళ మొహాల్లో
నవ్వు తగ్గదు జీవితాల్లో లోటు జరగదు ,అందరూ మహా నటులను కోవాలా ,వారికది
అలవాటనుకోవాలా . ఏమో వంశ పారం పర్యం గా వచ్చిన పరంపర కావచ్చు మరి .

నేను మాత్రం అందరూ బావుండాలని ,అందులో నేనూ  ఉండాలని కోరుకుంటున్నా .

*************************************************************************

పెళ్లిచూపులు .

(పెళ్లికూతురి నిర్వాకం )

పిల్లలకు ఫ్రీడమ్  ఇవ్వాలి  నిజమే కానీ ఎంతవరకు  దేనికైనా  హద్దుంటుంది . వాళ్ళు అడిగిందల్లా చిన్నతనం లో
అమర్చి పెడతాము . ఎదిగే కొద్దీ కొన్ని  జాగ్రత్తలు తీసుకోవాలి  లేక పొతే మొండికెత్తి  వాళ్ళు చెప్పిందే వేదమంటూ మనమే వాళ్ళ మాట వినేట్టు చేసుకుంటారు . థాంక్ గాడ్ .. నాకా పరిస్థితి లేదు  నేను (చాలా )

జాగ్రత్తలు తీసుకున్నాను . కానీ కొన్ని ఇళ్లల్లో  జరిగేవి చుస్తే భయమేస్తోంది . పెళ్లీడు కొచ్చిన పిల్లలు ఉంటే

సినిమా తీయొచ్చు  అన్ని విచిత్రాలు  జరుగుతున్నాయి .

ఐటీ ఉద్యోగం వెలగబెడుతున్న  పాతికేళ్ల కొడుకుని  సెలవు పెట్టమని ,పెళ్ళిచూపులకి  వెళదామని  తల్లి
చెప్పగానే , ముందుగా  వాళ్ళుచేసే పని 'తాతకి' వంట్లో  బాగాలేదని ఊరు వెళ్తున్నామని  చెప్పి సెలవు
తీసుకుంటారు .  తల్లికి బాధ కలిగి అదేంట్రా శుభమా అని పెళ్లి చూపులకి  వెళదామంటే ,ఆరోగ్యం
బాగాలేదని  అబద్దం చెప్పి సెలవు పెట్టావు  అదికూడా  తాతగారికి అంటే 'అబ్బా ..లైట్ మా, లేకపొతే
మా మేనేజర్  లీవ్ ఇవ్వడు '. ఇది వాళ్ళ వాదన . (తాతగారు బ్రతికే వున్నా ఆరేళ్లక్రితం మరణించినా
సరే ) ప్రస్తుతానికి ఇది మన కాన్సెప్ట్ కాదు కనుక  వాళ్ళు వెళ్లిన చోట ఏంజరిగిందో  చెప్తాను . అంతాకలిసి
ఐదుగురు  వెళ్లారు  వచ్చారు . వూరినించి  రాగానే మేమంతా  అమ్మాయి ఎలావుందీ ,పెళ్లి కుదిరి పోయిందా
అంటూ  ప్రశ్నల వర్షం  కురిపించాము . శాంతి గారు (అబ్బాయి తల్లి )చెప్పింది  విని  మేం నోళ్లు వెళ్ళబెట్టాము .
వెళ్లినవాళ్ళకి  మర్యాదలు అవి బాగానే  చేశారట  అమ్మాయిని చూపించారట బావుందట ,అబ్బాయి మొహం

చుస్తే  తనకి కూడా నచ్చినట్టు అనిపించిందట ,శాంతి గారు కొడుకుని చూసి కళ్ళెగరేస్తే  బావుందన్నట్టు తలాడించాడట ,సరే మీరిద్దరూ  కాసేపు మాట్లాడు కోండి  అని మేడ  మీదికి  పంపించారట . పైకి వెళ్ళగానే

సిగెరెట్  అలవాటుందా  అని అడిగింది  ఎంత అలవాటున్నవాడన్నా  పెళ్ళిచూపుల్లో సిగెరెట్  కలుస్తానని
ఒప్పుకోడానికి  ఆలోచిస్తుంటే , అక్కడే ఉన్న రూమ్ నించి సిగెరెట్ తెచ్చి  ఇవ్వడమే కాకుండా తాను కూడా
వెలిగించింది ,అదికూడా కాదు అబ్బాయిని బాధించింది లంగాఓణిలో  పొగ ఊది పారేసింది  అది నచ్చలా
మనోడికి . అంతే  కాదండోయ్  మీకు లవ్  స్టోరీ  ఎమన్నా వుందా ,అని అడిగిందట  అబ్బే అలాంటిదేమన్న
ఉంటే పెళ్లి చూపులకి  ఎందుకొస్తాను  అంటే '' నాకు లవ్ స్టోరీ వుంది మరి  ,వాడు మా డాడీ తో మాట్లాడాడు
డాడీ' నో ' అన్నాడు  మావాళ్లు కులం పిచ్చోళ్ళు ,వాడు యూ ఎస్ వెళ్లి పోయాడు  మీకు ఏమాత్రం యూ ఎస్
వెళ్లే ఆలోచన వున్నా నాకు ఈ పెళ్లి ఇష్టమే !!?? అందట . మనోడు పరుగో పరుగు . అన్నీ అమ్మకు చెప్పుకుని
ఏడ్చినంత పనిచేసాడు . తల్లి మనసు బాధతో  తల్లడిల్లి పోయింది ఈసారి బాగా వివరాలు తెలుసుకుని

వెళ్లాలండి  అని శాంతిగారు చెప్తుంటే  నాకు కాళ్ళు వణికాయి . ఇంతకీ  యూ ఎస్  వెళ్లి 

మనోడికి హ్యాండిచ్చే ఆలోచనలో ఉందని  శాంతిగారు  విడమర్చి చెప్పితేగాని తెలియలేదు మరి . 

(పెళ్ళికొడుకు నిర్వాకం )

ఆ మధ్య  ఒక సంఘటన  నాకు చాలా ఆశ్చర్యం కలిగించింది . అదేమిటంటే ,ఎవరు, ఏమిటీ
అని మీరు అడక్కూడదు మరి :) ఒకబ్బాయికి  అమ్మాయికి పెళ్లిచూపులు జరిగాయి . అబ్బాయికి
అమ్మాయి నచ్చింది ,అలాగే అమ్మాయికి కూడా  అబ్బాయి నచ్చాడు . పెద్దవాళ్ళకు పెట్టు
పోతలు  నచ్చాయి ,అంటే ఇచ్చి పుచ్చు కోడాలు అన్నమాట . కధ సుఖాంత మైందా ,
ముహుర్తాలు  పెట్టు కున్నారు ,నెల రోజుల్లో పెళ్లి , ఇక్కడే పెద్ద మలుపు  ,కుదుపు నూ
అమ్మాయి వాళ్ళ ఇల్లు రోడ్డుకి  ఇవతల వుంది . అవతలికి వెళ్ళాలి అంటే  కాలువ మీదుగా
వెళ్ళాలి ,అటు వైపు వెళ్ళడానికి  ఒక తాటి దుంగ వేసి ఉంచారు ,కాలి  నడకను వెళ్లే వాళ్ళు
ఆ దుంగ మీదుగా నడిచి వెళ్తారు . ఎన్నో ఏళ్లుగా ఆదుంగ అలాగేవుంది  వాహనాలువున్నవాళ్ళు
చుట్టూ తిరిగి వెళ్తే లేని వాళ్ళు  దగ్గర కదా అని  దుంగ మీదుగానడిచి వెళ్తారుచిన్నప్పటి నించి
అలవాటున్న ఆ అమ్మాయి  ఆరోజు ఖర్మ కాలి , కాలు జారి  కాలువ లో పడిపోయింది . చుట్టూ
వున్నవాళ్లు  వెంటనే  బయటకు తీశారు . చిన్నపాటి  గాయాలతో  బ్రతికి బయట పడింది .
విషయం పెళ్లి వాళ్లకి తెలిసింది  అత్తగారు  పలకరింపుకు వచ్చింది . (అని వీళ్ళనుకున్నారు )
వచ్చినావిడ  చల్లగా ఒక కబురు చెప్పింది  ఏమిటో తెలుసా ''నాలా లో పడిపోయిన అమ్మాయిని
మా అబ్బాయి పెళ్లి చేసుకో నంటున్నాడు '' ఇదీ విషయం . ఎవరెంత నచ్చ చెప్పినా  వినలేదు
పెళ్లి క్యాన్సిల్  చేసుకున్నారు . నాలాలో (కాలువ )పడిపోతేనే  పెళ్ళికి పనికి రాదనుకుంటే
విధి వంచితులను ఉద్ధరించే వాళ్ళున్నారు  వాళ్లేమై పోవాలి ?? అమ్మాయి త్వరగా ఆ పీడకల
నించి కోలుకుని పెద్దవాళ్ళు చూసిన  మరో కొత్త జీవితం ఎంచుకుంది . కానీ నాకు మాత్రం
ఆ అబ్బాయి  ఇప్పటికి గుర్తు కొస్తూనే ఉంటాడు , ఏమి వ్యక్తిత్వం ?ఏమి పెంపకం ?ఎలా
బ్రతుకుతున్నాడో  తెలుసు కోవాలని ఉంటుంది .
 
********************************************************************************

మీకివి గుర్తున్నాయా ..

గతం లో  అమ్మమ్మ ,నాన్నమ్మ ఇళ్లల్లో ఇవన్నీ  మనం చూసి వున్నాము . బహుశా మన 

పిల్లలకి ఇవి తెలియక పోవచ్చు ,ఎందుకంటే మనమే దాదాపు మర్చిపోయాము.  కనుమరుగు 

అయిపోయిన వీటిని  మరో సారి గుర్తు చేద్దామని  నాదొక చిన్న ప్రయత్నం .